‎ސޯޝަލް މީޑިއާގައި ދައުރުވަމުންދާ ވީޑިއޯއެއްގައި ތިޔަބޭފުޅާ ވިދާޅުވީ "އަހަރެމެންނަށް ކުޅެވޭނެ ކޮންމެ ކުޅިއެއްވެސް" މިހެންނެވެ. ތިޔަބޭފުޅާ އެހެން ވިދާޅުވީ ވަރަށް ޔަގީންކަމާއި ޖެހިލުންކުކުޑަކަމާއި އެކުގައިކަން ވަރަށްބޮޑަށް ފާހަގަކުރެވެއެވެ. ގިނަ ރައްޔިތުން އެ ވީޑިއޯގައި ތިޔަބޭފުޅާ ވިދާޅުވި އެއްޗެއް އަކުރުން އަކުރަށް އަދިވެސް ހަނދާން އެބަހުއްޓެވެ. އެއީވެސް ރައްޔިތުންގެ ކުރިމަތީގައި ވީ ވައުދެއް ފަދައިންނެވެ. މިއަދު އަޅުގަނޑުމެން ބޭނުންވަނީ އެ ބަސްތަކުގެ ޒިންމާ ތިޔަބޭފުޅާ އުުފުއްލެވުމަށެވެ. ވީމާ، ތިޔަބޭފުޅާއަށް ބޭނުން ކުޅިއެއް ކުޅެވޭނަމަ، މި ތުޅާދޫގެ ތަރައްޤީއަށްޓަކައި ކުޅެންޖެހޭ އެންމެ އަސާސީ "ކުޅިތައް" ކުޅެ، އެކަން ހަޤީގަތަކަށް ހަދައިދީ، އަމަލުން އެކަން ސާބިތުކޮށްދިނުން އެދެމެވެ. ހަނދުމަފުޅު ބަހައްޓަވާށެވެ! ރައްޔިތުން ވޯޓުދީގެން ތިޔަ މަގާމަށް ތިޔަބޭފުޅާ ހޮވީ، އިޚުލާޞްތެރިކަމާއިއެކު ރައްޔިތުންނަށް ޚިދުމަތްކުރުމަށެވެ. އަމިއްލަ ވިޔަފާރި ކުރިއަރުވައި، އަމިއްލަ މަންފާ ހޯދުމަކަށް ނޫނެވެ.

‎ބޯހިޔާވަހިކަމަކީ އަންޒަމާނުއްސުރެ ތުޅާދޫ ރައްޔިތުންނަށް ކުރިމަތިވެފައިވާ އެންމެ ބޮޑު، އެންމެ ހިތްދަތި ބުރައެވެ. ކުލަނުޖެހިވާ އެންމެ ބޮޑު ހުވަފެނެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ، މިކަމުގައި ހަކުޅި ކުރިއަށް ނުކުޅެވުނެއްކަމަކު އެންމެ ކުޅިއެއް ނަމަވެސް ކުޅެދެއްވާށެވެ. އަދި ވަކިން ހާއްސަ ކުޅިއެއް ކުޅެގެން ނަމަވެސް މިހާރު ނިމިފައިވާ 100 ހައުސިން ޔުނިޓު އޭގެ ހައްގުވެރިންނާ ހަވާލު ކޮށްދެއްވަބައްލަވާށެވެ.

‎ތިޔަބޭފުޅާ ކެމްޕޭން ދުވަސްވަރު، ތުޅާދޫގެ ރައްޔިތުންނަށް 1000 ވަޒީފާ ހޯދައިދޭނެ ކަމަށް ވައުދު ވެވަޑައިގެންނެވީމުއެވެ. ދިހަ ވަޒީފާއެއް ނޫނެވެ، ފަންސާސް ވަޒީފާއެއް ނޫނެވެ، އެއްހާސް ވަޒީފާއެވެ. އެ ވަޒީފާތައް ކޮބައިތޯ އަޅުގަނޑުމެން އޮޅުންފިލުވަން ބޭނުމެވެ. ސަބަބަކީ، މިހާރުވެސް ވަޒީފާ ބޭނުންވާ އެތައް ޒުވާނުންނެއް މިރަށުގައި އެބަތިއްބެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ އެ ވަޒީފާތައް އުފައްދަވާށެވެ. ނޫންނަމަ ރައްޔިތުންގެ ކުރިމަތީގައި ދޮގު ހެއްދެވި ކަމަށް އެއްބަސްވެވަޑައިގަންނަވާށެވެ.

‎ތިޔަބޭފުޅާ އަޅުގަނޑުމެންނަށް އެއާޕޯޓެއްގެ ހުވަފެން ދައްކަވައި، އެއީ މާދަމާވެސް ވާނެ ކަމެއްގެ ގޮތުގައި ދެއްކެވިއެވެ. ތުޅާދޫއަށް އިންވެސްޓްމަންޓްތައް އައިސް، އަޅުގަނޑުމެންގެ ދިރިއުޅުން ބަދަލުވާނެ ކަމަށް ވިދާޅުވިއެވެ. ނަމަވެސް މިހާރު އެއަރޕޯޓު މަޝްރޫއަށް ބައްލަވާށެވެ. އެ މަސައްކަތް ކުރިއަށްދަނީ ބަރަވެލި ދުވެލީގައެވެ. މީގެ 10 ވަރަކަށް އަހަރު ކުރިން 17 ހެކްޓަރުގެ ބިމެއް ހަފްތާއެއްހާ ދުވަސްތެރޭ ހިއްކާ ނިންމާލިތަން އަޅުގަނޑުމެންގެ ލޮލުން ގައިމު ދުށިންވިއްޔާއެވެ. އަޅުގަނޑުމެންގެ ފަޅު ކޮންނަމުންދަނީ އެ މަސައްކަތާ ނުބައްދަލު ކުޑަކުޑަ ޑުރެޖަރަކުންނެވެ. ތިޔަބޭފުޅާ އެންމެ މުހިންމު މަޝްރޫއު ކަމަށް ވިދާޅުވި މަޝްރޫއަށް، ބޭނުންކުރަނީ ކުޅޭކުޅޭ ކޮންނަބޯޓެކެވެ. މަސައްކަތް ލަސްވާ ކޮންމެ ދުވަހަކީ، އަޅުގަނޑުމެންގެ ރަށަކީ އެއްވެސް އަގެއް ނެތް ރަށެއްގެ ގޮތުގައި ދެކެވޭ ދުވަހެކެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ އެކަށީގެންވާ ބޮޑު ޑްރެޖަރެއް ގެނެސް، މަސައްކަތް އަވަސްކޮށް، ފެށި މަސައްކަތް އަވަހަށް ނިންމަވާދެއްވާށެވެ. އަޅުގަނޑުމެންގެ ފަޅުން ވެލިނަގައި، އެތައް ސަކަރާތެއް ޖަހައިގެން، ފަޅުގެ ދެބައިކުޅައެއްބައި ހަލާކުކޮށްލާ، އުންމީދުތައް މުގުރާނުލައްވާށެވެ.

‎ރަށުގައި އެކަށީގެންވާ ހޮސްޕިޓަލެއް ނެތުމުން، އަދި ސިއްހީމަރުކަޒުގައި ވަސީލަތްތައް ނެތުމުން، މާބަނޑު މީހުންނާއި ދޮށީއުމުރުގެ މީހުން، އެމީހުންގެ ވޭންތައް ތަހައްމަލުކުރާ ތަން ބަލަން ތިބެތިބެ އަޅުގަނޑުމެން އަވަދިވެއްޖެއެވެ. އާދައިގެ ސްކޭންއެއް ކޮށްލަން ޖެހުނަސް މާލެއަށް ނޫނީ އޭދަފުއްޓަށް ދަތުރު ކޮށްކޮށް އަޅުގަނޑުމެން ވަރުބަލިވެއްޖެއެވެ. ވީމާ ހޮސްޕިޓަލު ނިމޭތޯ ނުނިމޭތޯ ބަލަން ނުހުންނަވާ، އެންމެ ކުޑަމިނުން މާބަނޑު މީހުންނަށް ބޭނުންވާ ސްކޭން މެޝިންގަނޑެއް ގެނެސްދެއްވާށެވެ. ބޭނުންކޮށްފައިހުރި ބާ މެޝިންގަޑެއް ނަމަވެސް ވަރިހަމައެވެ. އަޅުގަނޑުމެންނަށް ފެންނަނީ، ހޮސްޕިޓަލުގެ މަޝްރޫއު އިންތިހާއަށް ލަސްވަމުންދާ މަންޒަރެވެ. މި މަޝްރޫއު ކުރިއަށްދަނީ ހަމައެކަނި ކެމެރާތައް ހުންނަ ވަގުތުއެވެ. ކެމެރާތައް ދިއުމުން މަސައްކަތް ހުއްޓެއެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ  އަވަހަށް ހޮސްޕިޓަލު ހަލުވި ސްޕީޑުގައި ނިންމަވާދެއްވާ، ވަސީލަތްތައް ހަމަކޮށް، މުވައްޒަފުން ހޯދައި، އެތަން ހުޅުވައިދޭށެވެ.

‎އަޅުގަނޑުމެންގެ މަގުތަކުގެ ހާލަތަކީ ލަދުވެތި ކަމެކެވެ. ކޮންމެ މަގެއްގައިވެސް ވަޅުގަނޑުތަކާއި އަޑިގަނޑުތަކެވެ. ވާރޭ ވެހުމުން ފެންބޮޑުވެއެވެ. ފެންހިންދާ ނިޒާމެއް ނެތެވެ. 2026 ވަނަ އަހަރުވެސް ކުދިން ސްކޫލަށް ދާން މިޖެހެނީ، ޗަކަ ފެންގަނޑު ތެރެއިން ހިނގާފައެވެ. އަޅުގަނޑުމެން އަދިވެސް މިތިބީ، ފުރަތަމަ ތާރުމަގުގެ އިންތިޒާރުގައެވެ. މަޝްރޫއު އަދި ފެށިފައެއްވެސް ނެތެވެ. އެކަން އަދިވެސް އެއޮތީ ކެންޕެއިން ވައުދެއްގެ ގޮތުގައެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ އަޅުގަނޑުމެންގެ މަގުތަކުގައި ތާރު އަޅާ، ފެންހިންދާ ނިޒާމު ހަދައިދީ، އަޅުގަނޑުމެން ދައްކާ ޓެކްސްއާ އެކަށީގެންވާ އުމްރާނީ ތަރައްގީއެއް އަޅުގަނޑުމެންނަށް ހޯއްދަވައިދެއްވާށެވެ. ތިޔަބޭފުޅާ މާލޭގެ އޮމާން މަގުތަކުގައި ދުއްވަވާއިރު، ނިކަމެތި ރައްޔިތުން ޗަކަގަނޑު ތެރޭގައި ހިނގަން ދޫކޮށްނުލައްވާށެވެ.

‎އެތައް ސަތޭކަ އާއިލާއެއް ދިރިއުޅޭ ރަށެއްގައި، ފުލުހުންގެ މަރުކަޒެއް ނެތެވެ. މިހާރުވެސް ފުލުހުން ބޭނުންކުރަމުންދަނީ އާންމުން ދިރިއުޅުމަށް ދޫކޮށްފައިވާ ގޯތިތަކެވެ. މިއީ 21 ވަނަ ޤަރުނުގައި، ޤާނޫނު ތަންފީޒުކުރާ ތަނަކަށް އެކަށީގެންވާ ގޮތެއް ނޫނެވެ. ބޭންކް އޮފް މޯލްޑިވްސްގެ ބްރާންޗެއް ތުޅާދޫގައި ނެތެވެ. ޒުވާނުން އެއްވެ، އުނގެނި، ހުނަރު ތަރައްޤީ ކުރާނެ ޒުވާނުންގެ މަރުކަޒެއް ރަށަކު ނެތެވެ. ބައެއް ރަށްރަށުގައި ކައުންސިލްގެ އައު އިމާރާތް ބިނާކޮށް ނިމި، ޚިދުމަތް ދެމުން ދާއިރު މިރަށުގެ ކައުންސިލްގެ އައު އިމާރާތް ވީ ހިސާބެއްވެސް އަދި ނޭނގެއެވެ. ތުޅާދޫގެ ބޯހިޔާވަހިކަމުގެ މައްސަލަ ވަނީ ނުރައްކާތެރި މިންގަނޑެއްގައެވެ. ހެދިފައި ހުރި ފުލެޓުތައް ހަވާލު ނުކޮށްގެންނާއި، ބޯހިޔާވަހިކަމުގެ އާ މަޝްރޫއެއް ނުހިންގާތީ، އަދި ކުރިޔަށް ރޭވިފައިވެސް ނެތީތީ، ގިނަ އާއިލާތަކެއް ދިރިއުޅެނީ އިންތިހާއަށް ދަތިހާލުގައެވެ. ކަރަންޓުގެ ޚިދުމަތް ބަލިކަށިވެފައި އިތުބާރު ކުޑައެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ ރައްޔިތުންގެ މި ބޭނުންތައް ފުރިހަމަކޮށްދެއްވާށެވެ.

‎ޒުވާނުންނާއިމެދު ހަމްދަރުދީވެލައްވާށެވެ. އަޅުގަނޑުމެންގެ ޒުވާނުން އެއްވެ ކުޅިވަރު ކުޅެލާނެތަނެއް ނެތެވެ. އަޅުގަނޑުމެންގެ ސަގާފަތް ދިރުވާއާލާކުރާނެ ތަނެއް ނެތެވެ. މިރަށުގައި ކަލްޗުރަލް ސެންޓަރެއް އަޅަން ހަމަޖެހިފައިވީ ނަމަވެސް، އެހެން ކަންކަމެކޭވެސް އެއްފަދައިން އެކަންވެސް ވައިގެ ތެރެއަށް ގެއްލިއްޖެއެވެ. އެއީ ވޯޓު ގުނާ ނިމުމުން، ރައްޔިތުން މިއީ، ހުރިހާ ކަމެއް ހަނދާން ނެތޭނެ މޮޔައިން ކަމަށް ދެކި، ކެމްޕޭނެއްގައި ވީ ހުސް ވައުދުތަކަކަށް ވެއްޖެއެވެ. ތިޔަބޭފުޅާ ވިދާޅުވީ ބޭނުން ކުޅިއެއް ކުޅެވޭނެ ކަމަށެވެ. އެހެންވީމާ ސަގާފީ މަރުކަޒު ބިނާކޮށް، މި ރަށަށް ދިރުމެއް ގެނެސްދޭށެވެ. އަޅުގަނޑުމެންގެ ޒުވާނުން އެއްވެސް މަޤުސަދެއް، ނެތި މަގުމަތިވާން ދޫކޮށްނުލައްވާށެވެ.

‎އަޅުގަނޑުމެންނަށް ނުވިސްނޭ ކަމަކީ މިއީއެވެ. ތިޔަބޭފުޅާގެ އަތުގައި ހަޤީގަތުގައިވެސް ބޭނުން ކުޅިއެއް ކުޅުމުގެ ބާރު އޮތް ނަމަ، ސަރުކާރާއި، ބަޖެޓާއި، އެއްބަސްވުންތަކާއި، އަދި ނިންމުންތައް ތިޔަބޭފުޅާގެ ބާރުގެ ދަށުގައިވާނަމަ، އެއްވެސް ކަމެއް ނުވެ މިދަނީ ކީއްވެގެންތޯއެވެ؟ ކޮންމެ މަޝްރޫއެއް ހުއްޓި، ކޮންމެ ވައުދެއް އަނދުނަކަށް ވެގެންމިދަނީ، ކީއްނުވެގެންތޯއެވެ؟ އަދި ތިޔަބޭފުޅާ ފުރަތަމަ ވޯޓަށް އެދިވަޑައިގެންނެވި އިރާއި، މިހާރާ އަޅާބަލާއިރު މި ރަށަށް އެއްވެސް ބަދަލެއް ނައިސް އޮތީ ކީއްވެގެންތޯއެވެ؟ މިސުވާލުގެ ޖަވާބަކަށް އޮތީ އެންމެ ދެ ގޮތެކެވެ. އަދި އަޅުގަނޑުމެން ތިޔަބޭފުޅާއަށް މި ގޮވާލަނީ އެ ދެ ގޮތާ ކުރިމަތިލުމަށެވެ. ފުރަތަމަ ގޮތަކީ، ތިޔަބޭފުޅާއަށް ބޭނުން ކުޅިއެއް ކުޅެވޭނެ ބާރު އޮވެމެ، އަޅުގަނޑުމެންނަށް އެހީނުވާން އިޚުތިޔާރުކުރެއްވީއެވެ. އޭގެ މާނައަކީ ވޯޓު ހޯދަން ދޮގު ހައްދަވާ، އަޅުގަނޑުމެންގެ އިޙުސާސް ތަކުގައި ކޮޅުފައިން ޖެއްސެވީއެވެ. ދެވަނަ ގޮތަކީ، ތިޔަބޭފުޅާއަށް ބޭނުން ކުޅިއެއް ކުޅެވެން ނެތީއެވެ. ތިޔަބޭފުޅާ އެ ވިދާޅުވި ވަރުގެ ބާރެއް ނެތެވެ. އެއީ ހަމަ  ތިޔަބޭފުޅާ ފަޅުއްވާލެއްވި ކަރައެކެވެ.

‎އަޅުގަނޑުމެން މި އެދެނީ ހެޔޮފުޅުވުމަކަށް ނޫނެވެ. އަދި ސަލާންޖަހަނީކީއެއްވެސް ނޫނެވެ. އަޅުގަނޑުމެން މި ބޭނުންވަނީ ވީ ވައުދުތައް ފުއްދައިދިނުމަށެވެ. އަޅުގަނޑުމެން ބޭނުންވަނީ، އެ އެއްހާސް ވަޒީފާ ލިޔެކިޔުމުން ފެންނަން އޮވެ، ކަށަވަރުވެ، ރައްޔިތުންނަށް ލިބުމަށެވެ. އެކަށީގެންވާ ވަސީލަތްތަކާއިއެކު، އާންމުންނަށް ފެންނާނެ ތާވަލަކާއިއެކު އެއާރޕޯޓް ނިންމުމަށެވެ. ހޮސްޕިޓަލްގެ ހިދުމަތް ފުރިހަމައަށް ފެށި، މުވައްޒަފުން ހަމަވުމަށެވެ. މަގުތަކުގައި ތާރު އަޅާ ނިންމުމަށެވެ. ޕޮލިސް ސްޓޭޝަން ބިނާކޮށް ޚިދުމަތް ފެށުމަށެވެ. ސަގާފީ މަރުކަޒު ބިނާކޮށް އާންމުންނަށް ހުޅުވާލުމަށެވެ. ކައުންސިލްގެ އައު އިމާރާތް އަވަހަށް ބިނާކޮށްދީ، ޚިދުމަތްތައް އަވަސްކޮށްދިނުމަށެވެ. އަދި ކޮންމެ މަޝްރޫއެއްގެ މައުލޫމާތާއި، އެއްބަސްވުންތަކުގެ ތަފްސީލުތަކާއި، ބަޖެޓު، ހާމަކަން ބޮޑު ގޮތެއްގައި، ރައްޔިތުންނަށް ފެންނާނޭހެން އާންމުކުރުމަށެވެ.

‎ތިޔަބޭފުޅާ ރައްޔިތުންގެ ކުރިމަތީގައި ވީ ވައުދުތައް އަޅުގަނޑުމެން ހަނދާން އެބަހުއްޓެވެ. ހަގީގަތުގާ ތިޔަބޭފުޅާ ވީ އެންމެ ބޮޑު ވައުދަކީ "އަހަރެމެންނަށް ކުޅެވޭނެ ކޮންމެ ކުޅިއެއްވެސް" ކަމަށްބުނެ ވީ ވައުދެވެ. ތިޔަބޭފުޅާ ބޭނުންވީ ބާރު އޮތްކަން އަޅުގަނޑުމެންނަށް އަންގައިދިނުމަށެވެ. އެހެންވީމާ، މިހާރު އެ ބާރު ތިޔަބޭފުޅާ ހޮވި ރައްޔިތުންނަށްޓަކައި ބޭނުންކުރުމުގެ އިހުލާސްތެރިކަން ހުރިކަން ސާބިތުކޮށްދޭށެވެ. ނޫންނަމަ އިސްތިއުފާ ދެއްވާ، ހަގީގަތުގައިވެސް ތުޅާދޫއަށް އަޅާލާ، ދާއިރާގެ ނަމުގައި ރައްޔިތުންގެ މަޖިލީހުގައި އަޑު އުފުލައިދޭނެ މީހަކު، ތިޔަ ބޭކާރުކުރައްވާ ގޮނޑިއަށް ކުރިމަތިލުމުގެ ފުރުސަތު ދެއްވާށެވެ.